حوزہ نیوز ایجنسی کی رپورٹ کے مطابق، انجمنِ صاحب الزمان کارگل لداخ کے زیرِ اہتمام تے سورو میں انقلابِ اسلامی ایران کی 47 ویں سالگرہ کی مناسبت سے جشنِ انقلابِ اسلامی نہایت عقیدت، جوش و خروش اور انقلابی جذبے کے ساتھ منایا گیا؛ اس موقع پر ایک باوقار اور شاندار ریلی کا انعقاد کیا گیا۔
ریلی آستانۂ عالیہ تیسورو سے مکمل نظم و ضبط اور پرامن ماحول میں نکالی گئی اور امام بارگاہ پر اختتام پذیر ہوئی۔ اس تاریخی موقع پر بزرگوں، نوجوانوں اور طلبہ کی بڑی تعداد نے شرکت کی اور عدل، اتحاد، مزاحمت اور اسلامی اقدار کے ساتھ اپنی بھرپور یکجہتی کا اظہار کیا۔
مکمل تصاویر دیکھیں:
کارگل لداخ میں انقلابِ اسلامی ایران کی 47ویں سالگرہ جوش و خروش سے منائی گئی
اس موقع پر فضا انقلابی نعروں، ایمان کی حرارت اور اسلامی شعور سے گونج رہی تھی۔ تقریب کی صدارت معزز مہمان حجت الاسلام سید ہاشم موسوی نے کی، جبکہ مصطفیٰ کمال نے کلیدی خطاب پیش کیا۔
انہوں نے اسلامی انقلاب کی تاریخی اہمیت، اس کی نظریاتی بنیادوں اور دنیا بھر کی مظلوم اقوام پر اس کے مثبت اثرات کو مدلل انداز میں اجاگر کیا۔
ڈاکٹر عبد الہادی کھاوس (معتمدِ عامہ، الاحسان کمیٹی) نے پسماندہ طلبہ کے تعلیمی مسائل پر روشنی ڈالی اور عوام سے اپیل کی کہ وہ اجتماعی ذمہ داری کے جذبے کے تحت ان طلبہ کی مدد کریں، تاکہ وہ جدید علوم، سائنس اور مصنوعی ذہانت کے میدان میں آگے بڑھ سکیں، جو امام خمینیؒ کے تعلیمی وژن کا حصہ تھا۔
معزز خطیب مولانا الطاف حسین ثقافی (چیئرمین، مدرسہ فاطمۃ الزہراؑ، دراس) نے اپنے خطاب میں اتحادِ امت، اخلاقی ذمہ داری، قرآن اور اہلِ بیتؑ کی تعلیمات پر عمل کی ضرورت پر زور دیتے ہوئے انقلاب کی کامیابی میں بصیرت مند قیادت کے کردار کو بھی نمایاں کیا۔
تقریب کا اختتام مولانا عبداللہ حکیمی کی خصوصی دعاؤں سے ہوا، جن میں رہبرِ معظم کی صحت، درازیٔ عمر اور حفاظت کے لیے دعا کی گئی، نیز اسلامی جمہوریہ ایران کی ترقی، استحکام، امن اور خوشحالی کے لیے خصوصی دعا کی گئی۔
آخر میں منتظمین نے تمام شرکاء، معاونین اور سرکاری انتظامیہ کا تہہ دل سے شکریہ ادا کیا کہ جن کے تعاون سے یہ پروگرام کامیابی سے ہمکنار ہوا اور اسلامی انقلاب کے پائیدار اقدار کے فروغ کے عزم کا اعادہ کیا گیا۔
آپ کا تبصرہ